7 Aprel 2020 4970

Navoiy IIB: Karantinda uyda qolib, “koronavirus” xavfidan qutilgan, biroq internet tarmog'i orqali yot g'oyalarga “tutilgan” shaxslarga qanday jazo ko'rildi?

Navoiy viloyati IIB TvaEQKB xodimlari tomonidan olib borilgan tezkor sa'y-harakatlar natijasiga ko'ra, 1988 yil Navoiy shahrida tug'ilgan, millati o'zbek, ma'lumoti o'rta-maxsus, oilali 2 nafar farzandi bor, Navoiy shahri, “Xoncharbog'” MFYda istiqomat qiluvchi fuqaro Y.Sh. shaxsiy telefon apparati orqali internet jahon ijtimoiy tarmog'ining “Odnoklassniki.ru” sahifasida ism-sharifini o'zgartirgan tartibda profil ochib, turli xil diniy saytlarlarga kirganligi aniqlangan. Y.Sh. aqidaparastlik g'oyalari bilan yo'g'rilgan, O'zbekiston Respublikasi hududida tayyorlash, tarqatish va xorijdan olib kirish ta'qiqlangan, “Katibatul` imom al-Buxariy” terroristik tashkilotining g'oyaviy rahnomalaridan hisoblangan “Abdulloh Buxoriy”ga tegishli bo'lgan ma'ruzalarni yuklab, ularni virtual do'stlariga tarqatgan holda, diniy targ'ibot-tashviqot ishlarini ham amalga oshirgan. Mazkur holat yuzasidan Y.Sh.ga nisbatan O'zbekiston Respublikasi Jinoyat kodeksining 244-moddasi 3-qismi bilan to'plangan hujjatlar Jinoyat Protsessual kodeksining 84-moddasi 5-qismiga asosan harakatdan tugatilgan.

Shuningdek, DXX viloyati boshqarmasi va Navoiy viloyati IIB TvaEQKB xodimlari tomonidan hamkorlikda olib borilgan o'rganishlar davomida, 1990 yil Qiziltepa tumanida tug'ilgan, millati o'zbek, ma'lumoti o'rta-maxsus, uylanmagan, ayni paytda tumandagi “Rabot” MFYda istiqomat qiluvchi K.Z. internet tarmog'ining “Odnoklassniki.ru” sahifasidagi shaxsiy profilida O'zbekiston Respublikasining amaldagi davlat tuzimini Konstitutsiyaga xilof ravishda o'zgartirishga xizmat qiladigan, xususan, “Mahmud Abdulmo‘min O'zbekiston haqida mp4” nomli faylda “Mahmud Abdulmo'min”ga tegishli bo'lgan videomateriallarni virtual do'stlariga tarqatib, salbiy targ'ibot-tashviqot ishlarini olib borayotganligi aniqlangan. Mazkur holat yuzasidan K.Z.ga nisbatan O'zbekiston Respublikasi Jinoyat kodeksining 159-moddasi 1-qismi bilan jinoyat ishi qo'zg'atilgan.

Barchamizga ma'lumki, yurtimizda tahlikali epidemik vaziyat hukm surayotgan, xalqimiz birdamlikda “Koronavirus” infektsiyasiga qarshi kurashayotgan mashaqqatli vaziyatda, fuqarolarimizning salomatliklari birlamchi omil ekanligi nuqtayi nazaridan “Uyda qoling!” kabi murojaatlar har soniyada barcha OAV orqali bot-bot takrorlanmoqda. Taassufki, uyda qolib, tunu kun internet ijtimoiy tarmoqlarida besamar vaqt sarflayotgan, yot g'oyalarni targ'ib etuvchi saytlarda bilib-bilmay virtual do'stlar orttirayotgan, ushbu holatga beparvo yondashuvchi loqayd kishilar ham oramizda bor.

Aziz fuqarolar, mas'uliyatni his eting. Kichik e'tiborsizlik katta ko'ngilgilsizliklarni yuzaga keltirishi mumkin. Hayotingizni xatarga qo'ymang. Uyda qolib, o'zingizga va yaqinlaringiz salomatligini asrash bilan birga, oila davrasida kitobxonlik saodati hamda mutolaa zavqidan bahramand bo'ling!

Navoiy viloyati IIB Axborot xizmati

© 2006-2023. Barcha huquqlar himoyalangan
Sayt materiallaridan foydalanilganda www.iiv.uz sayti ko'rsatilishi shart
Sayt yaratuvchisi: Online Service Group
Belgilangan matnni tinglash uchun quyidagi tugmani bosing
Тепага