16 Fevral 2020 4436

O'zingizni ehtiyot qiling, firibgarlar tuzog'iga tushmang

Keyingi paytda fuqarolarni aldash va firibgarlik yo'li bilan ularga tegishli bank plastik kartalaridan noqonuniy ravishda pul echib olish holatlari tez-tez uchrab turibdi.

Mana, bir misol. 2019 yil 15 dekabr` kuni Qoraqalpog'iston Respublikasi Beruniy tumanida yashovchi fuqaro M.B.ning uyali telefonidagi “Telegram” ijtimoiy tarmog'ining “Jesco aksiyasi” guruhidan unga “Siz 75 ming so'm pul yutdingiz, pulni telefon raqamingizga tashlab beramiz” degan sms xabari keladi. Ushbu xabar orqali M.B.ning telefon raqami va plastik karta raqami aniqlanadi. Biroq uning plastik kartochkasiga pul mablag'i tushmaydi, aksincha, 868 ming so'm echib olinadi.

YAna bir holat. Unga ko'ra, Farg'ona viloyatining Farg'ona tumanida yashovchi fuqaro B.A. tuman IIB boshlig'i nomiga ariza bilan murojaat qilib, o'z arizasida joriy yilning 11 yanvar` kuni noma'lum shaxs soat taxminan 21:15larda o'ziga tegishli bo'lgan plastik kartochkasidan ma'lum miqdordagi pulni noqonuniy yo'l bilan echib olganligini, noma'lum shaxsni aniqlab unga qonuniy chora ko'rishni so'ragan.

Olib borilgan tergovga qadar tekshiruv harakatlari davomida ma'lum bo'lishicha,  fuqaro B.A. 11 yanvar` kuni soat 21:11larda Samarqand shahridagi xonadonida bo'lgan vaqtida o'ziga tegishli oshxona mebelini sotish maqsadida uning suratini internet do'koniga joylashtiradi. Ko'p o'tmay, unga Rossiya Federatsiyasiga tegishli bo'lgan abonent raqamidan qo'ng'iroq bo'ladi. Notanish kishi B.A.ga oshxona mebelini sotib olishini, pulni esa plastik kartaga o'tkazib berishini aytib, undan plastik kartochkasining seriya raqami va sms xabaridagi kodni so'raydi. Tabiiyki, begonaga ishongan fuqaro chuv tushadi – uning plastik kartasidan jami 1.442.000 so'm pul mablag'i echib olinadi.

Hozirda har ikkala holat yuzasidan jinoyat ishi qo'zg'atilgan.

Fuqarolarimizdan internet ijtimoiy tarmoqlarida e'lon qilinayotgan turli aktsiyalarga ishonmasliklarini, o'zlari tanimagan-bilmagan shaxslarga bank plastik kartalarining seriya raqamlari va kodlarini aytmasliklarini so'rab qolamiz.

IIV Axborot xizmati

© 2006-2022. Barcha huquqlar himoyalangan
Sayt materiallaridan foydalanilganda www.iiv.uz sayti ko'rsatilishi shart
Sayt yaratuvchisi: Online Service Group
Belgilangan matnni tinglash uchun quyidagi tugmani bosing
Тепага